最近小編係連登(LIHKG)見到有個帖文，關於一個女仔向網友求救男友話要冷靜期點算好，一路追POST先知原來樓主真係逼得太緊，好似控制狂咁監視住男朋友嘅一舉一動，莫過話男仔頂唔順，就連小編見到都覺得好大壓力！一段感情想長久同穩定，絕對唔係靠 24 小時 Check 住另一半黎維持，一齊睇下情侶之間應有既相處之道喇。

#唔好放肆情緒

我諗呢個世界都無咩人唔鐘意比人氹既，不過凡事都要適可而止，唔好郁Ｄ就發脾氣要另一半氹，就算你話自己好易氹都係！想要擁有一段和諧又甜蜜既感情，情緒管理絕對係重要既一環，亂發脾氣只會破壞雙方既感情，不斷發脾氣只會令對方覺得好有壓力，久而久之，自然會磨蝕對方既愛同耐心。

＃尊重對方

每個人都雖要自己私人時間同空間，就算係情侶都唔應該侵占曬對方所有生活，要留返啲喘息空間俾雙方。尤其係唔好強逼對方改變自己嘅喜好，可能佢鐘意打LOL，打FIFA，甚至食雞都好，即使你覺得無聊唔鐘意，都唔好禁止對方做自己既喜好，不仿試下代入對方角度，打機減壓其實好正常！正如你都唔想自己男朋友唔準你再買化妝品同睇淘寶一樣！

＃信任對方

一段關係如果缺乏信任就會好難繼續行落去，雖然有呷醋同妒忌既心態都好正常，不過唔好同樣唔好過份管制對方，甚至 Check 實對方既行蹤，唔止隔幾分鐘就要睇下你LAST SEEN 有冇上線同人傾計，甚至要你開埋 Find My Friends睇你位置，淨係聽到都滴曬汗！拍拖唔係坐監，越管制對方只會令感情更壓抑，令對方更加抗拒。如果你地相處開心，互相信任又愛對方，你唔Check 佢都唔會出軌；但如果對方係會出軌既人，你check 得再勁都一樣會偷食。